D’Zeitung “Financial Times” hat Enn August gemellt, datt déi fréier Direkteren EU-Sanktiounen ëmgaangen hätten. Den CSSF-Generaldirekter Claude Marx sengersäits sot, datt déi entspriechend Informatioune vun der brittescher Zeitung - Zitat - "net onbedéngt richteg" wären. Wat net géif stëmmen, dozou konnt a wollt de Chef vun der Bankenopsiicht awer net konkret ginn.
Den CSV-Finanzminister Gilles Roth huet betount, et wär net seng Aufgab ze kucken, ob Sanktiounen ëmgaange goufen oder net.
"Ech kann Iech soen, dass op der Lëtzebuerger Finanzplaz souwuel vun de Justizautoritéiten wéi och vun eiser Bankenopsiicht, der CSSF, déi Aarbecht mat grousser Suergfalt gemaach gëtt."
D’Oppositiounsdeputéiert hunn dann och fonnt, datt si net méi schlau gi wieren. D’LSAP an déi gréng hate gefrot, fir an der Kommissioun iwwer d’Affär Gazprombank ze schwätzen.
