VW baut weltwäit 50.000 Aarbechtsplazen of: Och nees Wierker an Däitschland betraff

Däitschland

Gëschter - 06h03

VW baut weltwäit 50.000 Aarbechtsplazen of: Och nees Wierker an Däitschland betraff

Beim däitschen Autoskonstrukteur VW ass et elo offiziell. Eng weider 50.000 Aarbechtsplaze gi weltwäit ofgebaut. No wochelaangen Diskussiounen huet den Opsiichtsrot vu VW gëschter Owend dem Sanéierungsplang vum Konzernchef Oliver Blume zougestëmmt, an zwar eestëmmeg.

1 min

(Foto: Radio 100,7)

Mam sougenannten "Zukunftsplang 2030“ sollen déi massiv Iwwercapacitéite vu VW an Europa ofgebaut an d‘Produktiounskäschte reduzéiert ginn. An Däitschland stinn déi véier VW Produktiouns-Wierker Hannover, Emden, Zwickau a Neckarsulm virun engem eventuellen Aus. Hei stinn nach emol ronn 45.000 Plazen um Spill.

Insgesamt kéint VW bis 2030 also bal 100.000 Plazen ofbauen.

Alternativen Notzung: Rüstungsindustrie

Bis Juni d‘nächst Joer soll no alternativen Notzunge gesicht ginn, zum Beispill duerch d‘Rüstungsindustrie oder a Kooperatioun mat chineesesche Produzenten.

Den aktuelle Sanéierungsplang wier déi déifgrënnegst Transformatioun an der Geschicht vum Volkswagen Group, seet de Konzern. E wär néideg, fir d‘Zukunft vu VW vis a vis der Konkurrenz laangfristeg ze sécheren.